Kungiyar dattijan arewa Northern Elders Forum (NEF) ta koka a kan halin rashin tsaro da arewa ke ciki tare da zargin shugaban kasa, Muhammadu Buhari, da gaza yin maganin matsalar.
A cikin wani jawabi da ya fito ranar Lahadi, jagoran kungiyar, Ango Abdullahi, ya ce lamarin rashin tsaro yana kara tabarbarewa a kullum.
Ya ce yawaitar hare - haren 'yan bindiga da mayakan kungiyar Boko Haram ke kaiwa alama ce dake nuna cewa gwamnatin Buhari "ta fadi kasa warwas" a bangaren tsaro da walwalar 'yan kasa.
"Kungiyar dattijan arewa ta damu matuka a kan yawaitar hare - hare da asarar dukiya a yankin arewacin Najeriya me ciki.
"Yadda 'yan bindiga suke cin karensu babu babbaka ya nuna cewa yanzu yankin arewacin Najeriya yana hannun 'yan ta'adda, sai yadda suka ga dama suke yi.
"A bayyane take cewa gwamnatin Buhari da gwamnatocin jihohi sun rasa yadda zasu bullowa lamarin, sun gaza kare rantsuwar da sukayi a kan cewa za su kare jama'a da dukiyoyinsu.
Lamarin tsaro kullum kara tabarbarewa yake yi, saboda 'yan ta'adda sun fahimci cewa akwai raunin shugabanci a wannan gwamnati, lamarin da ya basu karfin gwuiwar kai munanan hare - hare a kan jama'a," a cewarsa.
Farfesa Ango Abdullahi ya bayyana cewa arewacin Najeriya bai taba shiga cikin yanayin rashin tsaro kamar na wannan lokacin ba, tare da zargin shugaba Buhari da daukan alkawuran da basa sauya komai.
"Lokaci ya yi, tura ta kai bango. An san mutanen arewa da hakuri da girmama doka da shugabanni, amma ya kamata gwamnatoci su sani cewa hakurin jama'a ya kare.
"Muna sane da cewa wasu 'yan arewa na shirin gudanar da zanga - zangar lumana, kamar yadda kundin tsarin mulki ya basu dama da 'yanci, domin jawo hankalin shugaba Buhari da sauran shugabanni a kan halin da suke ciki a arewa," a cewar Farfesa Ango.
Sai dai fadar Shugaban kasa ta mayar da martani ta bakin Femi Adesina cewa kungiyar ta Zama ta mutum daya, tare da zargin kungiyar da shiga lamuran siyasa, inda take kalubalantar Shugaba Buhari a lamura da-dama
No comments:
Post a Comment